Қазақстан Республикасы Премьер-Министрінің Бірінші орынбасары Роман Склярдың төрағалығымен тұрмыстық электроника және инновациялық шешімдер саласындағы халықаралық көшбасшы Samsung Electronics Central Eurasia мен қазақстандық компания Silk Road Electronics арасында стратегиялық келісімге қол қойылды.

Ынтымақтастық Саран қаласындағы Silk Road Electronics зауытында өндірілген Samsung теледидарларын, Samsung Electronics Central Eurasia компаниясына, одан әрі Қазақстанда әрі экспорттық нарықтарда да сату үшін жеткізуді қарастырады.

Бұған дейін 2024 жылдың желтоқсан айында Samsung бас кеңсесі мен қазақстандық Silk Road Electronics арасында Қарағанды ​​облысының Саран қаласындағы кәсіпорын базасында теледидар шығару туралы келісімге қол қойылған болатын. Зауыт Samsung теледидарларының кең топтамасын шығаратын болады.

Жоба 2025 жылдың екінші жартысында басталады деп жоспарлануда. Бірінші жылы озық технологияға өсіп келе жатқан сұранысты қанағаттандыратын өндірісті қамтамасыз ету жоспарлануда. Бұл ауқымды жоба Қазақстан өнеркәсібі үшін жаңа мүмкіндіктер ашады және жоғары білікті жұмыс орындарын құрады.

«Samsung бұрыннан сапа мен инновацияның нышаны болып табылады. Біз осы аты аңызға айналған бренд өнімдерінің Қазақстанда шығарылатынын мақтан тұтамыз. Бұл ынтымақтастық әлемдік көшбасшылар тарапынан отандық өндірушілерге деген сенімнің жоғары деңгейін көрсетеді. Өндірілетін өнім ең жоғары сапа стандарттары мен Samsung брендінің озық технологияларына сай болады», – деді Silk Road Electronics директоры Александр Крицкий.

Мұндай ынтымақтастық Қазақстан үшін: озық технологияларды енгізу, экспорттық әлеуетті нығайту және елдің халықаралық технологиялық экожүйедегі ықпалын кеңейту мүмкіндігі секілді бұрын-соңды болмаған өркендеуді ашады.