8-mart Xalqaro xotin-qizlar kunini nishonlash va millatlararo totuvlik, tenglik va bagʻrikenglik (DEI) qadriyatlari haqida fikr yuritish uchun Samsung Newsroom turli millat vakillaridan tashkil topgan Samsung xodimlari — rahbarlardan tortib, yangi ishga kirganlar va DEI menejerlarigacha ularning rivojlanayotgan DEI madaniyati haqidagi fikrlarini tinglash uchun suhbatlashdi.

“Millatlararo totuvlik xalqaro kompaniyaning barqaror o‘sishini taʼminlaydigan muhim tushunchadir va Samsung hamma uchun innovatsiyalarni birdek taqdim etishga sodiqdir”, dedi Samsung Electronics’ning Global Marketing Office prezidenti va marketing bosh direktori Younghi Li.

“Xalqaro kompaniya sifatida brendimizning falsafasi — mijozlarning muammolarini hal qilish va ularning mamlakati, irqi va jinsidan qat’i nazar dunyoning istalgan burchagida bizning texnologiyamiz va innovatsiyalarimiz yordamida yaxshiroq hayot kechirishlariga yordam berishdir. Biz butun tashkilot boʻylab oʻz burchimizni unutmagan holda mijozlar bilan ushbu qadriyatlarimizni chin dildan baham koʻrishga harakat qilmoqdamiz”, dedi u.

Li hamkasblarning fikrlarini tinglash va ochiq muhokamalar oʻtkazish orqali har bir kishining oʻz millatiga xos qarashlari asosida imkoniyatlarini kengaytirish uchun xodimlarni turli xil madaniyatni boricha qabul qilish odatiga chaqirdi.

Xalqaro xotin-qizlar kunini nishonlash chog‘ida u ayollarga doimo o‘zligiga sodiq qolishini va o‘z salohiyatiga ishonishi kerakligini taʼkidladi. “Ishonamanki, ayollar oʻzlarini sinab koʻrishsa va boshqalarga koʻr-koʻrona ergashishning oʻrniga oʻzlari xohlagan ishni oʻzlariga xos tarzda amalga oshirishga intilishsa, bu nafaqat ular uchun, balki butun jamiyat uchun muhim oʻzgarish olib keladi.”

Samsung Electronics’ning inklyuziv dizayn masʼuli boʻlgan Interaction Design Team dizayneri sifatida Gunho Chae barcha foydalanuvchilarning etnik kelib chiqishini hurmat qiladigan mahsulot va xizmatlarni ishlab chiqish uchun brendning keng mijozlar bazasini hisobga oladi.

Samsung oʻzining inklyuziv tili uchun atamalar lugʻatini ishlab chiqdi va xodimlar DEI qadriyatlarini barcha foydalanuvchi interfeysi elementlari va tasvirlariga kiritishi uchun yoʻriqnomalar va oʻquv qoʻllanmalarini yaratdi.

“Samsung barcha mijozlarni birdek qabul qiladi va ularning yoshi, nogironligi, oilaviy ahvoli, jinsi, irqi, madaniyati yoki ijtimoiy-iqtisodiy holatidan qatʼi nazar ularga birdek munosabatda boʻladi”, dedi Chae. “Biz har bir foydalanuvchini hurmat qilamiz va ularga eng zoʻr qulayliklarni taqdim etishda mahsulotlarimiz, xizmatlarimiz, qoʻllanmalarimiz va reklamalarimizni ularga moslashtirishga intilamiz.”

Samsung Electronics America kompaniyasida DEI’ni nazorat qiluvchi Mishel Enn Manglal-Lan xodimlar muammosiz muloqot qilishlari, bir-birlarini tushunishlari va yaqindan tanishishlari uchun qulay muhitni yaratishga intiladi. U, ayniqsa, ayol xodimlarni motivatsiya bilan taʼminlash va korporativ madaniyatni rivojlantirishga sodiq. Bunday muhitda esa xodimlar oʻz salohiyatini koʻrsatish imkoniga ega boʻlishadi. Oʻtgan yili u hamkorlik tarmogʻini yaratish va DEI’ga oid ilgʻor tajribalarni almashish uchun Amerika xodimlar boʻlimi guruhlari (ERGs) konferensiyasini tashkil qildi.

“Oʻtkaziladigan ERG’lar xodimlarimizning qiziqishi va DEI bilan shugʻullanishi natijasida vujudga kelgan”, dedi Manglal-Lan. “Birgalikda kuchliroqmiz va maqsadlarimizga tezroq erisha olamiz. Shimoliy Amerika mintaqamiz ERG’ni ishga tushirgan birinchi ofis ekanligidan faxrlanaman.

Samsung Electronicsʼning vizual displey (VD) bo‘limining yangi xodimi Jiyoon Jang Samsung’ning Suvondagi ofisi — Digital City’ga birinchi bor qadam qo‘yganida kompaniya o‘zi tasavvur qilganidan-da bagʻrikeng, turli millat va elatlarga mezbon ekanini angladi. “Biz yangi xodimlarni ishga qabul qilish mashgʻulotlarida DEI boʻyicha treningdan oʻtdik va men turli xil millat odamlari bor joyda bagʻrikenglik madaniyati muhimligini tushunib yetdim.”

“Men Samsung ijtimoiy masʼuliyatidan kelib chiqib, koʻp xayriyalar qilib kelganini bilardim”, dedi u. “Samsung’ga qoʻshilganimdan beri men kompaniya haqiqatan ham inklyuziv texnologiyalarni ishlab chiqishga chin dildan sodiqligiga amin boʻldim.”

Koʻrish qobiliyati past odamlar uchun Relumino rejimi va eshitish qobiliyati past odamlar uchun ovoz chiqarib oʻqiladigan subtitrlar VD boʻlimi kompaniya mahsulotlarini yanada qulaylashtirish va boʻlimning “Hamma uchun ekranlar” shiori bilan uygʻunlashtirish uchun ishlab chiqqan loyihalardan biridir.

“Umid qilamanki, kelajakda ishlaydigan loyihalarim millatlararo totuvlik va bagʻrikenglikka hissa qoʻshadi va qilayotgan ishim bilan faxrlana olaman”, dedi Jang. “Men maʼlum odamlar guruhiga nisbatan kamsitishlar va avlodlararo mojarolar jaholat va eʼtiborsizlikdan kelib chiqadi deb bilaman, shuning uchun men imkon qadar koʻproq sessiyalarda qatnashish va millatlararo totuvlik, tenglik va bagʻrikenglik haqida oʻqish orqali oʻzimni tarbiyalash uchun koʻproq harakat qilaman.”

700 dan ortiq xodimlar yana bir tadbirda ayol hamkasblar va ularning hayotidagi oila aʼzolariga minnatdorchilik bildirish uchun vaqt ajratdilar. 2021-yildan buyon o‘tkazib kelinayotgan DX bo‘limining ayol rahbarlar seminarida ayol rahbarlar kompaniyaning qarashlari va ayol yetakchilarni tarbiyalash yo‘llarini muhokama qilish uchun bosh direktor bilan samimiy suhbatlar o‘tkazdilar. Bundan tashqari, joriy yilda ayol dasturchilar uchun murabbiylik dasturi ishga tushiriladi.

▲ Xodimlar DX boʻlimi tomonidan oʻrnatilgan fotosurat devori oldida qo‘llari bilan yurakcha — rasmiy Xalqaro xotin-qizlar kunini ifodalovchi imo-ishora shaklini yasashdi.

Joriy mart oyidan boshlab Device Solutions (DS) boʻlimi oʻz xodimlari orasida millatlararo totuvlik, tenglik va bagʻrikenglik (DEI) qadriyatlariga oid bilimlarni chuqurlashtirish boʻyicha oylik tadbirlarni tashkil etadi. Ayollar, nogironlar, gʻamxoʻrlik qiluvchilar va chet elliklarga qaratilgan DEI mavzularini tanlagandan soʻng boʻlinma har oy xodimlarga bir-birlarini qoʻllab-quvvatlashni oʻrganish imkoniyatini beradigan tanlovlar va treninglar oʻtkazadi. Bundan tashqari, boʻlinma Xalqaro xotin-qizlar oyini nishonlashda ayol yetakchilar bilan suhbatlar oʻtkazadi va ularning yetakchilik borasida va yosh ayollar oʻz martabalarida qanday oʻsishi mumkinligi haqida oʻz fikrlarini bildiradi.

Koreyadan tashqarida kompaniya ayollarga ishga joylashish va moliyaviy mustaqillikka erishishda yordam berish uchun kiyim-kechak xayriya aksiyalarini tashkil etish maqsadida uchta mamlakatda (AQSh, Kanada va Meksikada) Dress For Success (DFS) [1] bilan hamkorlik qiladi. DEI haqida bilimlarni chuqurlashtiruvchi vebinar va seminarlar ham oʻtkaziladi.

Oʻtgan yilning noyabr oyida DX boʻlimi biznesning barcha sohalarida DEI qadriyatlarini aks ettirish, takomillashtirish yoʻnalishlarini aniqlash va inklyuziv korporativ madaniyatni yanada targʻib qilish uchun DEI ofisini tashkil qildi. Bu orqali ofis kompaniya tizimlari va madaniyatini kamsituvchi amaliyotlar mavjudligini tekshiradi va xodimlarga ushbu qadriyatlar haqida toʻgʻri tushuncha berish uchun treninglar va kampaniyalar oʻtkazadi. Bundan tashqari, ofis DEI’ga bagʻishlangan ixtiyoriy xodimlar boʻlimi guruhlarini (ERGs) qoʻllab-quvvatlaydi. Bu kompaniyaning rahbarlari ishtirok etadigan DEI kengashi orqali kompaniyaning millatlararo totuvligi va takomillashtirish maqsadlari boʻyicha muhokamalarni tizimlashtiradi. “Tizimni totuv va adolatli ravishda boshqarish oʻta muhim ahamiyat kasb etadi. Biz innovatsion mahsulotlar va xizmatlar DEI qadriyatlariga sodiq madaniyatdan paydo bo‘lishiga ishonamiz”, dedi Samsung Electronics kompaniyasining DEI bo‘limi bosh kotibi Jinxi Nam. “Bizning ofisimiz global DEI siyosatini yaratdi va millatlararo totuvlikni mustahkamlash va inklyuziv tashkiliy madaniyatni yaratish uchun turli dasturlarni amalga oshirishni rejalashtirmoqda.”

Samsung Electronics kompaniyasining DX boʻlimi raisi oʻrinbosari va bosh direktori Jong-Xi Xan va Samsung Electronics kompaniyasining DS boʻlimi prezidenti va bosh direktori Kye Xyun Kyung xodimlarga gender tengligini yodda tutish va Xalqaro xotin-qizlar kuni sharafiga DEI muhimligini alohida taʼkidlaydigan kompaniya miqyosidagi xabarni yetkazishdi. “Men DS boʻlimidagi mehnatsevar va sidqidil ayol xodimlarimizga oʻz minnatdorchiligimni bildirmoqchiman”, dedi Kyung. “Biz Samsung’da barcha xodimlarimizga shaxsiy va professional jihatdan oʻsish va oʻzlarining salohiyatini toʻliq roʻyobga chiqarishga yordam berishdan toʻxtamaymiz”, deb yana bir bor taʼkidladi Xan.

[1] 1997-yilda Nyu-York shahrida ishsiz va qisman ishsiz ayollarga iqtisodiy mustaqillikka erishishda yordam berish maqsadida tashkil etilgan.