Samsung Electronics Samsung AI Forum 2025 ni ochdi

Jahon miqyosidagi yetakchi AI tadqiqotchilaridan taqdimotlar va Samsung'ning soʻnggi tadqiqot faoliyati toʻgʻrisida

Samsung Electronics Co., Ltd.  15-16-sentyabr kunlari boʻlib oʻtgan Samsung AI Forum 2025 ochilishini eʼlon qildi. Toʻqqizinchi yilini nishonlayotgan ushbu forum yetakchi olimlar va soha mutaxassislari sunʼiy intellekt sohasidagi soʻnggi yutuqlarni baham koʻrish va kelajakdagi tadqiqot yoʻnalishlari haqida suhbatlashish uchun yigʻiladigan global maydon boʻlib xizmat qiladi.

“Samsung AI’ni yanada intuitiv va uzluksiz qiladigan asosiy texnologiyalarni ishlab chiqish uchun barcha operatsiyalarimizda AI’ni qoʻllaydi, — dedi Samsung Electronics prezident oʻrinbosari va ijrochi bosh direktori Young Hyun Jun soʻzboshida. — Bu yilgi Samsung AI Forum sunʼiy intellekt jamiyat va sanoatni qanday oʻzgartirayotganini muhokama qilish va mazmunli fikrlar hamda insaytlar almashish uchun sanoat va akademik doiralarida yetakchi mutaxassislarni birlashtiradi”.

Bu yilgi forumda dunyoga mashhur AI tadqiqotchilaridan maʼruzalar taqdim etildi: Monreal universiteti professori va chuqur oʻrganish boʻyicha kashshof Yoshua Bengio; Stenford universiteti professori va diffuziyaga asoslangan til modelini (DLM) ishlab chiqishga boshchilik qilgan Inception startapining asoschisi Stefano Ermon.

Birinchi kun: global tadqiqotchilar AI yarimoʻtkazgich kelajagi haqida suhbatlashdi

Samsung kompaniyasining Device Solutions (DS) boʻlimi Koreyaning Yongin shahridagi Samsung yarimoʻtkazgichlar maydoni yaqinida “Yarimoʻtkazgichlar sanoati uchun vertikal AI strategiyalari va kelajakka nazar” mavzusidagi forumning birinchi kunini oʻtkazdi.

Professor Bengio bugungi sunʼiy intellekt modellarining turli xavf-xatarlari, jumladan, odam nazoratini chetlab oʻtish qobiliyati va modellardan notoʻgʻri foydalanish potentsialini tavsiflovchi maʼruzani soʻzladi. Bunga qarshi chora sifatida u “Scientist AI”ni taqdim etdi. Yechim bu kabi tashvishlarni yumshatishga yordam berish uchun moʻljallangan yangi modeldir.

“Odamlarga taqlid qilish yoki ularni mamnun qilish maqsadida yaratilgan modellardan farqli oʻlaroq, Scientist AI tasdiqlangan fakt va maʼlumotlarga asoslangan toʻgʻri javoblarni berishga eʼtibor qaratadi”, — dedi professor Bengio modelning AI xavfsizligini oshiruvchi va ilmiy kashfiyotlarni tezlashtiruvchi imkoniyatlarini taʼkidlab. Shuningdek, u maʼruzada materiallarni ishlab chiqish uchun AI’dan foydalanishga oid soʻnggi tadqiqot natijalari bilan oʻrtoqlashdi.

Siemens EDA bosh prezident oʻrinbosari Amit Gupta “AI’ga asoslangan elektronikalar dizayni kelajagi” nomli sessiyani oʻtkazdi. Taqdimot chogʻida u sunʼiy intellektni elektronikalar dizaynini avtomatlashtirish (EDA) vositalariga integratsiya qilish muhimligini taʼkidladi va butun ish jarayonini qamrab oluvchi avtonom tizimlar sunʼiy intellektning toʻliq salohiyatini ochish uchun kalit boʻlishini aytdi.

Soʻng DS boʻlimining AI Center ijrochi prezident oʻrinbosari va rahbari Yong Ho Song, Pohang fan va texnologiya universiteti (POSTECH) professori Seokhyung Kang va Koreya ilgʻor fan va texnologiya instituti (KAIST) professori Il-Chul Moon ishtirokidagi texnik sessiyalar boʻlib oʻtdi. Har bir maʼruzachi yarimoʻtkazgichlarni proyeksiyalash va ishlab chiqarish uchun sunʼiy intellektni qoʻllashda soʻnggi tadqiqot ishlanmalari bilan oʻrtoqlashdi va ushbu soha qanday rivojlanayotgani haqida oʻz fikrlarini bildirdi.

“AI chip dizayni va dasturiy taʼminotni ishlab chiqishda muhim vositaga aylanib ulgurgan, — dedi ijrochi prezident oʻrinbosari Song. — Yarimoʻtkazgichlarni ishlab chiqarish yanada murakkablashar ekan, biz AI yuzaga keladigan texnik muammolarni hal qilishda yordam berishiga ishonamiz”.

Shuningdek, forumda yilning eng yaxshi Samsung AI tadqiqotchisi mukofotining uchta gʻolibi eʼtirof etildi: Toronto universiteti professori Nikolas Peypernot, Kaliforniya San Diego universiteti professori Rouz Yu va Nyu York universiteti professori Lerrel Pinto. Barcha sovrindorlar oʻz ishlarini taqdim etish va soʻnggi tadqiqotlari haqida fikr almashish uchun taklif qilindi.

Ikkinchi kun: AI agentlari davri va mahsuldorlikni oshirishga eʼtibor qaratish

Forumning ikkinchi kuni Samsung Device eXperience (DX) boʻlimi tomonidan onlayn tarzda oʻtkaziladi va Samsung Developer YouTube kanalida “Generativ AI’dan AI agentlarga” nomi bilan jonli efirga uzatiladi.^[1]

“Generativ AI kundalik hayot va sanoatda muhim vositaga aylanib ulgurgan, — dedi Samsung Electronics’da DX boʻlimi texnik direktori va Samsung Research rahbari Pol (Kyungwhoon) Cheun. — AI agentlar davriga qadam qoʻyar ekanmiz, Samsung foydalanuvchilarga sezilarli foyda keltiradigan AI texnologiyalarini rivojlantirishga eʼtibor qaratishda davom etadi”.

Ikkinchi kungi maʼruzalar Berkli universiteti professori va til modellari hamda AI agentlari boʻyicha yetakchi tadqiqotchi Jozef E. Gonzalez, Arizona shtati universiteti professori va AI rejalashtirish va qarorlar qabul qilish boʻyicha jahon miqyosidagi vakolatli shaxs Subbarao Kambhampati va Stenford universiteti professori va Inception kompaniyasining hammuassisi Stefano Ermonlar tomonidan oʻtkazildi.

Professor Gonzalez katta til modeliga (LLM) asoslangan tizimlarning agent imkoniyatlarini oshirish boʻyicha oʻz tadqiqotini taqdim etadi. Xususan, u agentlarga mulohaza yuritish, oʻrganish va rejalashtirish uchun oraliq boʻsh intervallardan foydalanish imkonini beruvchi uyqu vaqtidagi hisoblash paradigmasini namoyish etadi.

Professor Kambhampati LLM cheklovlarini ochishga qaratilgan katta fikrlash modellari (LRMs) boʻyicha oʻz tadqiqotlari bilan oʻrtoqlashadi. Uning taʼkidlashicha, hozirgi modellar matn yaratishda ustun boʻlsa-da, ular faktga asoslangan aniqlik, rejalashtirish va murakkab fikrlashda cheklanganligicha qolib ketmoqda. Professor javoblar toʻgʻri ekanligini taʼminlash, kontekstdan xabardor holda hisoblash kerakligi va oraliq fikrlash bosqichlarini talqin qilish kabi asosiy muammolarni sanab oʻtadi.

Professor Ermon til sohasiga tasvir, video va audio yaratish uchun keng qoʻllanadigan diffuziya modellaridan foydalanayotgan diffuziya tili modelini taqdim etadi. Ushbu yondashuv anʼanaviy ketma-ket matn yaratish usullaridagi cheklovlarni bartaraf etish va til modellari uchun yanada samarali paradigmani taklif qilishga qaratilgan.

Texnik sessiyalarda Samsung Research vakillari oʻzlarining soʻnggi ishlanmalarini taqdim etadilar. Jumladan:

• Rang haroratini avtomatik sozlash uchun AI kamera texnologiyasi

• LLM’ni yanada samarali oʻqitish va qoʻllash uchun bilimlarni saralash usullari

• Smartfonlar va televizorlar kabi isteʼmolchi elektronikasiga LLM’larni olib kirish uchun moʻljallangan qurilma ichidagi AI texnologiyalari

• Avtomatik dublyaj texnologiyasi. Bu maʼruzachining ovozida dublyaj yaratadi

• Tahlil qilish va avtomatik ravishda turli hisobotlarni yaratish uchun koʻp agentli tizimlardan foydalanadigan chuqur shoʻngʻish texnologiyasi

• Turli xil hujjat formatlarini avtomatik ravishda LLM va agent tizimlari tushunadigan maʼlumotlarga aylantiradigan AI hujjat texnologiyalari

• Ishlab chiquvchilar uchun generativ AI modellarining ishlab chiqish siklini qisqartiradigan qurilma ichidagi AI studiya

^[1] Avtonom qarorlar qabul qilish va vazifalarni mustaqil bajarishga qodir aqlli tizimlar.